"Manchester Yunayted" hujumchisi Joshua Zirkzee Italiya A Seriyasining ikki yirik klubi e’tiboriga tushdi.
Football Italia xabariga ko‘ra, ayni paytda 25 yoshli futbolchi uchun asosiy da’vogarlar "Yuventus" va "Napoli" hisoblanmoqda.
Niderlandiyalik futbolchi Turin klubiga o‘tishga rozilik bergan. Biroq "Yuventus" "Bolonya"ning sobiq yulduzini tarkibga qo‘shib olishdan avval hujumchilaridan biri bilan xayrlashishi kerak.
Bundan tashqari, Luchano Spallettida Zirkzeening taktik jihatdan jamoaga mos kelishi borasida ayrim shubhalar bor. "Yuventus" ustozi tarkibda klassik "to‘qqizlik"ni ko‘rishni istaydi. Zirkzee esa ko‘pincha maydon markaziga yaqinroq harakatlanib, to‘pni nazorat qilish va hujumlarni tashkil etishda jamoadoshlariga yordam berishni xush ko‘radi.
"Napoli" ham "qizil iblislar" hujumchisiga qiziqish bildirmoqda, ammo Neapol klubi "Arsenal" futbolchisi Gabriel Jezusni ustuvor variant sifatida ko‘rmoqda. Shuningdek, "Napoli" ham yangi hujumchi olishdan avval tarkibdagi futbolchilardan biri bilan xayrlashishi lozim. Katta ehtimol bilan Noa Lang jamoani tark etadi.
"Manchester Yunayted" esa Joshua Zirkzeeni majburiy sotib olish shartisiz ijaraga berishga tayyor. Bu holat futbolchining Italiya chempionatiga qaytish ehtimolini oshirmoqda.
