UEFA va KONKAKAF tashkilotlari Yevropa va Shimoliy Amerikaning 96 ta terma jamoasi ishtirokida yagona Millatlar Ligasini tashkil etish bo‘yicha muzokaralarni boshladi. The Guardian nashri berayotgan ma’lumotlarga ko‘ra, ushbu grandioz turnir 2028 yildanoq start olishi mumkin.

Ushbu loyiha konfederasiyalarning FIFA hamda uning prezidenti Janni Infantinoga qarshi kurashidagi navbatdagi qadamiga aylandi. Avvalroq UEFA va KONKAKAF Infantinoning iste’fosiga erishish maqsadida kuchlarni birlashtirgan edi.

Yangi musobaqa amaldagi Millatlar Ligasi kabi ko‘p bosqichli tizimga ega bo‘ladi. Yuqori divizionda Ispaniya, Fransiya, Angliya va Germaniya kabi Yevropa grandlari KONKAKAFning eng kuchli jamoalari — Meksika, AQSH va Kanadaga qarshi maydonga tushishadi. Guruh bosqichidan so‘ng pley-off va «to‘rtlik finali» o‘tkazilishi rejalashtirilmoqda.

O‘yinlar sentyabr, oktyabr va noyabr oylaridagi mavjud xalqaro tanaffuslar vaqtida, pley-off bahslari esa mart va iyun oylarida bo‘lib o‘tadi. Ushbu turnir terma jamoalarning hozirgi o‘rtoqlik o‘yinlari o‘rnini egallaydi va parvozlarni qisqartirish uchun o‘yinlar geografiyani hisobga olgan holda taqsimlanadi. Kelajakda ushbu global loyihaga Osiyo Futbol Konfederasiyasi ham qo‘shilishi mumkin.