«Koventri Siti» Premyer-liganing 1-turida «Arsenal»ga 0:3 hisobida imkoniyatni boy berdi. Amaldagi Angliya chempionlari Kay Xavers va Bukayo Sakaning 15 va 23-daqiqalardagi gollari evaziga tezkorlik bilan 2:0 hisobida oldinga chiqib olishdi, ikkinchi bo‘lim boshida esa Martin Edegor 49-daqiqada hisobni yirik ko‘rinishga olib keldi.

«Bu juda og‘ir va jiddiy sinov bo‘ldi, — deydi «Koventri» bosh murabbiyi Frenk Lempard. — «Arsenal» — fantastik jamoa. Yigitlarimiz uchun «Arsenal» qay darajada o‘ynashini ko‘rish yaxshi saboq bo‘ldi. Ular haqiqiy chempionlardek to‘p surishmoqda. Murakkab kechdi, ammo olingan bu tajriba kelajakda bizga foyda keltiradi.

Biz hali o‘z salohiyatimizni ko‘rsatamiz. «Arsenal» o‘z maydonida hali ko‘p jamoalarni mag‘lub etadi. Bugungi o‘yinda ham ijobiy jihatlar bo‘ldi, yigitlar bundan ko‘prog‘iga loyiq edilar», — deya ta’kidladi «osmon-moviylar» ustozi Sky Sports nashriga bergan intervyusida.

Eslatib o‘tamiz, o‘tgan mavsumda «Koventri» Chempionshipda g‘olib chiqib, oradan 25 yil o‘tib ilk bor Premyer-ligaga qaytgan edi.