«Real» yarim himoyachisi Arda Gyuler 2026/27-yilgi mavsumni asosiy tarkibdagi o‘rni borasida kuchli raqobat sharoitida boshlaydi. Turkiyalik futbolchi 2025/26-yilgi mavsumda yaxshi o‘yin ko‘rsatib, mavsumoldi tayyorgarlik jarayonida ham murabbiylar shtabida ijobiy taassurot qoldirdi.

Joze Mourinyoning 4-2-3-1 sxemasida «o‘nlik» pozisiyasida Jud Bellingem asosiy nomzod sifatida ko‘rilmoqda. Bu esa Gyulerning boshlang‘ich tarkibdagi o‘rnini kafolatlamaydi.

Shunga qaramay, The Athletic jurnalisti Mario Kortegana ma’lumotiga ko‘ra, «Real» rahbariyati ham, Mourinyo ham 21 yoshli futbolchining salohiyatiga to‘liq ishonadi. Madridliklar Gyulerni klubning uzoq muddatli kelajagida muhim o‘rin tutadigan futbolchilardan biri sifatida ko‘rmoqda.

Mourinyo ham yaqinda Gyulerning imkoniyatlarini yuqori baholab, kelajakda uni maydon markazida chuqurroq pozisiyada o‘ynaydigan futbolchi sifatida rivojlantirish mumkinligini ta’kidlagan.