«Inter» bosh murabbiyi Kristian Kivu A Seriyaning 1-turida «Monsa» ustidan qozonilgan 4:1 hisobidagi g‘alabadan so‘ng fikrlarini bildirdi. Uchrashuv Milan shahridagi «San-Siro» stadionida bo‘lib o‘tdi.

«Hozircha eng yaxshi jismoniy holatda emasligimizni bilardik va bu borada doimiy ravishda ishlayapmiz. Raqib pressing va ikkinchi to‘plar uchun kurashda bizga muammo tug‘dirdi. Biz bunday vaziyatlarda sekin harakat qildik.

O‘yin rejasiga amal qilishni istadik, ammo harakatlarimizda biroz taranglik va shoshqaloqlik kuzatildi. Yakka tartibda ham, jamoaviy jihatdan ham texnik o‘tkirlik yetishmadi. Ikkinchi bo‘lim boshida urilgan gol xotirjamlik va aniqlikni qaytarib, uchrashuvni nazoratimizga olishimizga yordam berdi.

Men uchun har bir futbolchi asosiy tarkib a’zosi hisoblanadi. Uning maydonga tushishi shaxsiy fazilatlari, raqib, vaziyat va jismoniy holatiga bog‘liq. Futbolchilarimning mavsumoldi tayyorgarlik jarayonida qanday ishlaganidan mamnunman. Klublar o‘rtasidagi jahon chempionatida qatnashib, ta’tildan belgilangan muddatdan oldin qaytgan o‘yinchilarning fidoyiligini ham alohida ta’kidlash kerak. Bu murabbiy ko‘rishi mumkin bo‘lgan eng qadrli holatdir.

Bu ko‘p yillardan buyon juda yuqori darajani saqlab kelayotgan yaxshi yigitlar guruhi. Men ularga ishonaman. Bizda hali o‘sish va o‘yinimizni yaxshilash uchun katta imkoniyat bor», — deya Kivuning so‘zlarini klub rasmiy sayti keltirdi.

«Inter» o‘tgan mavsumda 87 ochko to‘plab, A Seriya chempioni bo‘lgandi. Keyingi turda «neradzurrilar» 30 avgust kuni safarda «Kalyari» bilan o‘ynaydi.