«Manchester Siti» bosh murabbiyi Enso Mareska yarim himoyachi Rodrining jamoadan ketishiga munosabat bildirdi.

«Bu muammoni qanday hal qilamiz? Yangi Rodrini topishga harakat qilamiz. Vaziyat shunday.

Rodri bu yerga kelguniga qadar unda «Oltin to‘p», Chempionlar ligasi va klublar o‘rtasidagi jahon chempionati sovrinlari yo‘q edi. U jamoamizga kelib, ko‘plab muhim yutuqlarga erishdi.

Yetakchi futbolchilar ketganida, ularning munosib o‘rinbosarini topa bilish kerak. Bunday holatlar bir-biriga o‘xshaydi. Bu oddiy jarayon — o‘zgarish, muammo emas. Endi yana harakat qilib, barchasini to‘g‘ri amalga oshirishimiz kerak», — deya italiyalik mutaxassisning so‘zlarini BBC keltirdi.

30 yoshli ispaniyalik futbolchi «Barselona»ga o‘tdi. U Kataloniya klubi bilan 2030 yil yozigacha mo‘ljallangan shartnoma imzoladi.

Rodri 2019 yil yozidan buyon «Manchester Siti» sharafini himoya qilib kelayotgandi. U jamoa safida jami 298 ta uchrashuv o‘tkazib, 28 ta gol urdi va 32 ta golli uzatmani amalga oshirdi.