«Milan» hujumchisi Kristofer Nkunku yaqin vaqt ichida «RB Leypsig»ga qaytishi mumkin. Insayder Fabrisio Romano ma’lumotiga ko‘ra, 28 yoshli futbolchi nemis klubiga qaytishga rozilik bergan. So‘nggi ma’lumotlarda ham Nkunku va «RB Leypsig» shaxsiy shartlar bo‘yicha og‘zaki kelishuvga erishgani qayd etilmoqda.

Endi «RB Leypsig» «Milan» bilan muzokaralarni faollashtirgan. Nemis klubi Nkunkuni keyinchalik sotib olish huquqi bilan ijaraga olish varianti ustida ishlamoqda. Bonuslarni hisobga olganda, bitimning umumiy qiymati 33-35 million yevro atrofida bo‘lishi mumkin.

Ayni paytda «RB Leypsig» futbolchi uchun asosiy da’vogar hisoblanmoqda. «Nyukasl» ham Nkunkuga qiziqish bildirgan, biroq fransuzning o‘zi Germaniyaga qaytishni afzal ko‘rmoqda.

Nkunku uchun «RB Leypsig» begona klub emas. U 2019-2023 yillar davomida nemis jamoasi sharafini himoya qilgan.

Fransiyalik futbolchi «RB Leypsig» safida barcha musobaqalarda 172 ta uchrashuv o‘tkazib, 70 ta gol urgan va 56 ta golli uzatmani amalga oshirgan. U Germaniyadagi faoliyati davomida Bundesliganing eng yorqin futbolchilaridan biriga aylangan.