«Manchester Yunayted» himoyachisi Nussair Mazraui faoliyatini Italiya chempionatida davom ettirishi mumkin. 28 yoshli marokashlik futbolchiga «Milan» qiziqish bildirmoqda.

CaughtOffside ma’lumotiga ko‘ra, «rossonerilar» Mazrauini tarkibga qo‘shib olish imkoniyatini ko‘rib chiqmoqda. «Milan»ni hozirda «Manchester Yunayted»ning sobiq bosh murabbiyi Ruben Amorim boshqarmoqda va transfer amalga oshsa, mutaxassis sobiq shogirdi bilan yana birga ishlaydi.

Manba ta’kidlashicha, «Milan» Mazrauiga avval ham qiziqqan, biroq o‘sha paytda himoyachi klub uchun ustuvor nomzod hisoblanmagan. Boshqa bir transfer rejasi amalga oshmay qolgach, italiyaliklar marokashlik futbolchi variantiga qaytgan.

Shuningdek, Mazraui yaqinda agentini almashtirgan. Bu futbolchining jamoasini o‘zgartirish istagi bilan bog‘liq bo‘lishi mumkinligi aytilmoqda. Biroq «Manchester Yunayted» himoyachisini osonlikcha qo‘yib yubormasligi va «Milan» transfer uchun salmoqli mablag‘ to‘lashiga to‘g‘ri kelishi mumkin.

Mazraui joriy mavsum Angliya Premyer-ligasida bitta uchrashuvda maydonga tushdi va natijali harakat qayd etmadi. Transfermarkt portali uning bozor qiymatini 18 mln yevroga baholamoqda.