«Atletiko» sport direktori Mateu Alemani yozgi transfer oynasi yopilishi oldidan klubning rejalari va hujumchi Xulian Alvaresning kelajagi haqida fikr bildirdi.

Alemanining so‘zlariga ko‘ra, madridliklar transferlar borasida rejalashtirilgan asosiy ishlarni bajarib bo‘lgan.

«Asosiy ishlar allaqachon bajarildi. Biz transferlar va futbolchilarni sotish bo‘yicha rejalashtirgan ishlarimizni amalga oshirdik. Hozir yaxshi holatdamiz va xotirjammiz», — dedi Alemani.

Shuningdek, funksioner so‘nggi oylarda kelajagi ko‘p muhokama qilinayotgan Xulian Alvares masalasiga ham to‘xtaldi.

«Bu masala besh yoki olti oydan beri ko‘tarib kelinmoqda. Muhimi — bugungi vaziyat. Xulian jamoa qaydnomasida va maydonga tushishga tayyor. Buning o‘zi hamma narsani aytib turibdi va barcha savollarga javob beradi», — dedi «Atletiko» sport direktori.

Alvares 2024 yil yozida «Manchester Siti»dan «Atletiko»ga 75 mln yevro va 20 mln yevro miqdoridagi bonuslar evaziga ko‘chib o‘tgan. Argentinalik hujumchining madridliklar bilan shartnomasi 2030 yil yozigacha amal qiladi.

O‘tgan mavsumda Alvares «Atletiko» safida barcha musobaqalarda 49 ta uchrashuv o‘tkazib, 20 ta gol urdi va 9 ta golli uzatmani amalga oshirdi.