«Атлетико» спорт директори Матеу Алемани ёзги трансфер ойнаси ёпилиши олдидан клубнинг режалари ва ҳужумчи Хулиан Альвареснинг келажаги ҳақида фикр билдирди.

Алеманининг сўзларига кўра, мадридликлар трансферлар борасида режалаштирилган асосий ишларни бажариб бўлган.

«Асосий ишлар аллақачон бажарилди. Биз трансферлар ва футболчиларни сотиш бўйича режалаштирган ишларимизни амалга оширдик. Ҳозир яхши ҳолатдамиз ва хотиржаммиз», — деди Алемани.

Шунингдек, функционер сўнгги ойларда келажаги кўп муҳокама қилинаётган Хулиан Альварес масаласига ҳам тўхталди.

«Бу масала беш ёки олти ойдан бери кўтариб келинмоқда. Муҳими — бугунги вазият. Хулиан жамоа қайдномасида ва майдонга тушишга тайёр. Бунинг ўзи ҳамма нарсани айтиб турибди ва барча саволларга жавоб беради», — деди «Атлетико» спорт директори.

Альварес 2024 йил ёзида «Манчестер Сити»дан «Атлетико»га 75 млн евро ва 20 млн евро миқдоридаги бонуслар эвазига кўчиб ўтган. Аргентиналик ҳужумчининг мадридликлар билан шартномаси 2030 йил ёзигача амал қилади.

Ўтган мавсумда Альварес «Атлетико» сафида барча мусобақаларда 49 та учрашув ўтказиб, 20 та гол урди ва 9 та голли узатмани амалга оширди.