«Vest Xem» bir necha hafta davom etgan muzokaralardan so‘ng «Arsenal» qanot hujumchisi Rayss Nelsonni o‘z safiga qo‘shib olishga yaqin turibdi. Bu haqda klubga yaqin manba ExWHUEmployee xabar berdi.
Avvaliga «bolg‘achilar» ushbu transferni amalga oshirish borasida ikkilangan, ammo hozirda kelishuvni yakunlashga tayyor. Shu bilan birga, klub boshqa variantlarni ham ko‘rib chiqmoqda. Ular orasida «Viking» vingeri Edvin Austbyo ham bor.
«Qanot futbolchilariga kelsak, Rayss Nelson bo‘yicha kelishuv deyarli tayyor. Menga aytishlaricha, endi faqat «Vest Xem»ning yakuniy qarorini kutish qolgan. Klub boshqa variantlarni ham ko‘rib chiqmoqda, «Viking» futbolchisi Edvin Austbyo shulardan biri», — dedi ExWHUEmployee.
Xabarlarga ko‘ra, Nelsonni taxminan 3 million funt evaziga sotib olish mumkin. Biroq uning maoshi «Vest Xem» uchun asosiy muammolardan biri bo‘lishi mumkin. Futbolchi «Arsenal»da haftasiga qariyb 100 ming funt maosh oladi.
