Angliyaning «Sanderlend» klubi sobiq futbolchisi Denver Xyum 28 yoshida professional faoliyatini yakunlashini ma’lum qildi.
Bunga o‘tgan yil oktyabr oyida «Flitvud Taun» bilan mashg‘ulot paytida sodir bo‘lgan noxush holat oqibatida bosh suyagi jarohati va miyaga ichki qon quyilishi sabab bo‘ldi.
Oradan o‘n oy o‘tgach, shifokorlar futbolchiga professional futbol haqida boshqa o‘ylamaslikni qat’iy tavsiya qildi.
Xyum faoliyati davomida Angliya Premyer-ligasida «Sanderlend» safida to‘p tepgan. Ushbu klub tarkibida jami 84 ta uchrashuvda maydonga tushgan. Shuningdek, uning faoliyatida «Portsmut» va «Grimsbi Taun» kabi klublar ham bor.
