"Ipsvich" "Bayer" yarim himoyachisi Esekiel Palasios transferi bo‘yicha kelishuvga yaqin turibdi. Bu haqda The Athletic xabar berdi.

Manbaga ko‘ra, Angliya klubi 27 yoshli argentinalik futbolchi uchun yaxshilangan taklif bergan: 22,5 million yevro kafolatlangan to‘lov va yana 5 million yevro bonuslar. Palasios bilan to‘rt yillik shartnoma imzolanishi mumkin.

Agar transfer amalga oshsa, Palasios "Ipsvich" safida to‘p suradigan tarixdagi birinchi jahon chempioni bo‘ladi.

Avvalroq "Ipsvich" futbolchi uchun 15 million yevro taklif qilgan, biroq "Bayer" bu taklifni rad etgan edi.

Palasios 2020 yilda "River Pleyt"dan "Bayer"ga o‘tgan. U Germaniya klubi safida 185 ta uchrashuv o‘tkazib, 15 ta gol urgan va 17 ta golli uzatma amalga oshirgan.

2023/24 mavsumida argentinalik futbolchi "Bayer"ga Bundesligada chempion bo‘lishga yordam bergan.

O‘tgan mavsumda Palasios barcha musobaqalarda 25 ta o‘yinda maydonga tushdi. U o‘ng sonning yaqinlashtiruvchi mushagidagi jarohat sabab taxminan to‘rt oyni o‘tkazib yubordi.