Lissabonning "Benfika" klubi Myunxenning "Bavariya" jamoasidan Joau Palinyani sotib olganini rasman e’lon qildi.
Portugaliyalik yarim himoyachi "Benfika" bilan 2030 yilga qadar mo‘ljallangan shartnoma imzoladi.
OAV ma’lumotlariga ko‘ra, transfer summasi taxminan 14 million yevroni tashkil qilgan.
"Bavariya" Palinyani 2024 yilda 51 million yevro evaziga xarid qilgan edi. Biroq u Myunxen klubida asosiy tarkibdan mustahkam joy ola olmadi.
O‘tgan mavsumda Joau ijara asosida Londonning "Tottenxem" klubi safida to‘p surdi.
Ayni paytda 31 yoshli portugaliyalik futbolchining bozor qiymati 15 million yevro atrofida baholanmoqda.
Qizig‘i, Palinya "Benfika"ning prinsipial raqibi "Sporting" klubi tarbiyalanuvchisi hisoblanadi.
