«Arsenal» 26 yoshli vinger Rayss Nelson klubni tark etganini ma’lum qildi. London klubi va uning akademiyasi tarbiyalanuvchisi o‘zaro kelishuv asosida shartnomani bekor qildi.

Nelson faoliyatining katta qismini «Arsenal» tizimida o‘tkazdi. U 2016 yil dekabrida klub bilan ilk professional shartnomasini imzolagan, 2017 yil avgustida esa Angliya Superkubogi doirasida «Chelsi»ga qarshi o‘yinda asosiy jamoa safida debyut qilgan.

Keyinchalik angliyalik futbolchi ijara asosida «Hoffenhaym», «Feyenoord», «Fulhem» va «Brentford» klublarida to‘p surdi. O‘tgan mavsumni Nelson «Brentford»da o‘tkazib, barcha musobaqalarda 13 ta uchrashuvda maydonga tushdi va shularning uchtasini asosiy tarkibda boshladi. U sog‘lig‘i bilan bog‘liq muammolar tufayli mavsumning ayrim o‘yinlarini o‘tkazib yubordi.

Nelson «Arsenal» safida jami 90 ta uchrashuvda ishtirok etib, 8 ta gol urdi va 9 ta golli uzatmani amalga oshirdi.

Futbolchi faoliyatini «Vest Hem»da davom ettirishi mumkin.