Fransiya terma jamoasining sobiq hujumchisi Tyerri Anri o‘z faoliyati haqida xotiralari bilan o‘rtoqlashib, «Arsenal» bilan Chempionlar ligasi finalidagi og‘riqli mag‘lubiyati va keyinchalik «Barselona» safidagi triumfi haqida gapirdi.

«“Arsenal” bilan o‘ynagan Chempionlar ligasidagi birinchi finalim? Og‘riq! Bu har doim meni ta’qib qiladi. Men “Arsenal” muxlislariga bu sovrinni olib bera olmadim.

Ammo keyin hayot davom etadi, sen qaytasan — 2009 yilda ham xuddi shunday bo‘ldi, o‘shanda “Barsa” bilan barcha sovrinlarni qo‘lga kiritdim. Mag‘lubiyatga uchraysan, o‘rningdan turasan va yana cho‘qqi sari ko‘tarilasan», — deya Anrining so‘zlarini The Touchline keltirdi.

Anri faoliyatining eng yaxshi yillarini Londonning «Arsenal» klubida o‘tkazgan. U klub tarixidagi eng yaxshi to‘purarga aylangan — 228 ta gol urgan. Shuningdek, APLda ikki marta chempion bo‘lgan, jumladan 2003/04 yilgi mashhur «oltin mavsum»da mag‘lubiyatsiz chempionlikni qo‘lga kiritgan.

Anri, shuningdek, «Monako», «Yuventus», «Barselona» va «Nyu-York Red Bullz» klublarida ham o‘ynagan. Fransiya terma jamoasi safida 1998 yilgi jahon chempioni va 2000 yilgi Yevropa chempioni bo‘lgan.

2006 yilda Anri o‘ynagan «Arsenal» Chempionlar ligasi finalida «Barselona»ga 1:2 hisobida mag‘lub bo‘lgan.