«Aston Villa»ning argentinalik darvozaboni Emiliano Martines yaqin orada Londonning «Chelsi» klubiga qo‘shiladi. Bu haqda taniqli insayder Fabrisio Romano xabar berdi.
Manba ma’lumotiga ko‘ra, 33 yoshli Martines bugun tibbiy ko‘rikdan o‘tadi va shundan so‘ng «Chelsi» bilan shartnoma imzolaydi. Darvozabonning London klubi bilan kelishuvi 2028 yil iyun oyiga qadar mo‘ljallanadi va uni yana bir mavsumga uzaytirish imkoniyati ham bo‘ladi.
Martines 2020 yildan buyon «Aston Villa» sharafini himoya qilib kelmoqda. Shu vaqt ichida argentinalik golkiper barcha musobaqalarda 256 ta uchrashuv o‘tkazib, 305 ta gol o‘tkazib yuborgan va 80 ta o‘yinda darvozasi daxlsizligini saqlab qolgan.
