«Bavariya»ning sobiq hujumchisi, hozirda «Vankuver Uaytkeps» safida to‘p tepayotgan Tomas Myuller Bundesliganing 2026/2027 yilgi mavsumi haqidagi kutilmalari bilan o‘rtoqlashdi.

«Vensan Kompani boshchiligidagi “Bavariya” xotirjamlikka berilmaydi, chunki u jamoadagi barcha jarayonlarni qattiq nazorat ostida ushlab turadi. Ammo kelasi mavsumda Germaniyada “Bavariya” bilan raqobatlasha oladigan birorta ham jamoani ko‘rmayapman. Ehtimol, “Bavariya” o‘tgan mavsumdagidek taxminan 89 ochko to‘playdi. Boshqa hech kim bunday natijaga yaqinlasha olmaydi, deb o‘ylayman.

“Bayer”ning 90 ochko to‘plagani istisno holat edi. Albatta, chempionlik uchun odatdagidek da’vogarlar bor: Dortmundning “Borussiya”si, “Leypsig” va “Bayer”. Shuningdek, “Shtutgart”ni ham ambisiyali klub deb hisoblayman, ammo ular mavsumda 80 ochkodan ko‘proq to‘plashni maqsad qilgan jamoaga o‘xshamaydi.

Yangi “Bayer” paydo bo‘lishini ko‘rmayapman. “Borussiya” yaxshi mavsum o‘tkazadi. Albatta, “Bavariya” omadsizlikka uchrasa, ular yetakchi bo‘lish ambisiyasiga ega. Ammo bunday holat yuz bermaydi.

“Bavariya” avvalroq ikki nafar istiqbolli futbolchi — Ismael Saybari va Nataniel Braunni katta mablag‘ evaziga xarid qildi. Bu jamoa yanada kuchayishni maqsad qilganining yaqqol belgisi», — deya Myullerning so‘zlarini keltiradi Sport Bild.