«Nottingem Forest»ning hujumkor yarim himoyachisi Morgan Gibbs-Uayt «Chelsi» qiziqish doirasiga tushdi. Bu haqda jurnalist Bobbi Vinsent xabar berdi.
Manbaga ko‘ra, 26 yoshli angliyalik futbolchi «Manchester Siti»ga o‘tishi kutilayotgan Enso Fernandesning bilvosita o‘rnini bosuvchi sifatida ko‘rilmoqda. Gibbs-Uayt maydonda argentinalik futbolchiga nisbatan biroz yuqoriroq pozisiyada harakat qiladi. Transfer oynasi yopilguniga qadar «Chelsi» futbolchini sotib olish bo‘yicha taklif bilan chiqishi mumkin.
Morgan Gibbs-Uayt o‘tgan mavsumda «Nottingem Forest» safida 53 ta uchrashuvda maydonga tushib, 18 ta gol urgan va 7 ta golli uzatmani amalga oshirgan. Uning klub bilan shartnomasi 2028 yil 30 iyunga qadar amal qiladi.
