Madridning “Real” klubi yarimhimoyachisi Eduardo Kamavinga transfer oynasi yopilishi arafasida jamoani tark etishi mumkin. 23 yoshli futbolchi Joze Mourinyo qo‘l ostida asosiy tarkibdagi o‘rnini yo‘qotgan va unga “Manchester Yunayted” qiziqish bildirmoqda. Bu haqda Fichajes nashri xabar berdi.
Mourinyo “qirollik klubi” bosh murabbiyi etib tayinlanganidan so‘ng yarimhimoya chizig‘ida o‘zgarishlarni amalga oshirdi. Hozir bu pozisiyada Federiko Valverde, Bernardu Silva va Jud Bellingem asosiy tarkibdan joy olmoqda. Kamavinga esa so‘nggi uchrashuvlarda asosan zaxira o‘rindig‘ida qolib, o‘yinlarning oxirgi daqiqalarida maydonga tushirilmoqda.
Manbaga ko‘ra, Kamavinga bilan bog‘liq vaziyatdan “Manchester Yunayted” unumli foydalanishi mumkin. Angliya klubi mavsumni muvaffaqiyatsiz boshladi. “Qizil iblislar” APLning ilk turida “Hall Siti”ga 0:2 hisobida mag‘lub bo‘ldi. Jamoa navbatdagi uchrashuvda “Ipsvich” bilan bahs olib boradi.
Insayder Ruben Kanisaresning ta’kidlashicha, agar “Manchester Yunayted” yana ochko yo‘qosa, klub rahbariyati transfer bozorida faol harakat qilishi mumkin. Bu holatda “Real”ga Kamavinga uchun 70–80 million yevrolik taklif yuborilishi ehtimoli mavjud.
Mourinyo futbolchini sotishga qarshi ekani va jamoa tarkibi to‘liq shakllanganini ta’kidlamoqda. Biroq Kamavinga uchun 80 million yevrolik taklif “Real” rasmiylarining qarorini o‘zgartirishi mumkin.
Transfer bo‘yicha yakuniy qaror yaqin kunlarda qabul qilinishi kutilmoqda. Agar Kamavinga 30 avgust kuni “Malaga”ga qarshi uchrashuvda ham qisqa vaqtga maydonga tushsa, uning “Manchester Yunayted”ga transferi ehtimoli yanada oshadi.
Ma’lumot uchun, Ffransiyalik futbolchi 2021 yildan buyon “Real Madrid” safida to‘p tepmoqda. U “qirollik klubi”ga “Renn”dan 31 million yevro evaziga ko‘chib o‘tgan. Futbolchining klub bilan shartnomasi 2029 yilgacha amal qiladi. Transfermarkt portali esa uning bozor qiymatini 50 million yevroga baholamoqda.
