«Loryan» sobiq bosh murabbiyi Mikael Landro Chempionlar ligasi saralash pley-off bosqichi javob uchrashuvidan keyin «Lion» muxlislarini provokasiya qilgan «Fenerbaxche» yarim himoyachisi Matteo Genduzi haqida keskin fikr bildirdi.
27 yoshli fransuz futbolchisi o‘yin yakunlanganidan keyin «Lion» muxlislarini ataylab jahlini chiqarishga uringan. Tribunalar ostidagi xonalarga kirish oldidan esa «Lion» darvozabonlar murabbiyi Antonio Ferreyra unga tashlangan va shundan so‘ng ikki jamoa vakillari ishtirokida ommaviy janjal kelib chiqqan.
«U bolaligidanoq doimo boshqalarni provokasiya qilib keladi. Ochig‘ini aytsam, u bilan ishlash juda qiyin. U o‘ynagan deyarli barcha klublarda bir-ikki yildan ortiq qolmagan. Iqtidori bor, ammo odamlar undan allaqachon charchagan.
Kimdir: «Ha, lekin u yaxshi inson», deyishi mumkin... Yo‘q. Agar u asosiy tarkibda maydonga tushmasa, mashg‘ulotlarda hatto o‘z jamoadoshlari bilan ham muammo chiqaradi. Insoniy jihatdan u bilan munosabat o‘rnatish juda murakkab», — dedi Landro Foot Mercato'ga.
