«Manchester Siti» yarim himoyachisi Elliot Anderson Angliya Premyer-ligasining 2-turida «Kristal Pelas» ustidan qozonilgan 4:1 hisobidagi g‘alabadan keyin o‘z taassurotlari bilan o‘rtoqlashdi.

«Bugun menga hamma narsa yoqdi. O‘zimni ancha ishonchli his qildim. Bu mening uchinchi o‘yinim va, nazarimda, tobora yaxshilanib boryapman. Ammo oldinda hali juda ko‘p ish bor.

«Etihad»dagi debyut oldidan hayajonlandimmi? Albatta. Maydonga tushishdan oldin doimo hayajonlanaman, ammo «Etihad»dagi ilk uchrashuvim alohida ahamiyatga ega edi. Endi ikki o‘yinda ikki g‘alabamiz bor va bundan juda xursandman.

Menga bu yerda hammasi yoqyapti. Endi yanada tartibli o‘ynashni o‘rganishim kerak. O‘z pozisiyamni saqlash talab etiladi. «Nottingem Forest»da esa biroz erkinroq harakat qilardim.

Sherkining goli? Men shunchaki o‘tirib, kuzatdim. «Siti»ga kelganimdan beri buni har kuni ko‘ryapman: Rayan va Fil... Ularda juda katta iqtidor bor. Ochig‘ini aytsam, bu meni ajablantirmaydi. Ulardagi iste’dod hatto hayratga soladi», — dedi Anderson BBC'ga.

«Manchester Siti» mavsum boshidagi ikkinchi g‘alabasini qo‘lga kiritib, APL turnir jadvalida birinchi o‘ringa ko‘tarildi. «Kristal Pelas» esa ketma-ket ikkinchi mag‘lubiyatini qabul qilib, jadvalning so‘nggi pog‘onasida qoldi.

Keyingi turda «Manchester Siti» o‘z maydonida «Koventri»ni qabul qiladi. «Kristal Pelas» esa safarda «Fulxem»ga qarshi maydonga tushadi. Har ikki uchrashuv 5 sentyabr kuni bo‘lib o‘tadi.