«PSJ» 2025/26 yilgi mavsum yakunlari bo‘yicha klub xodimlariga jamoaviy mukofot puli to‘laydi. Bu haqda L’Équipe xabar berdi.

Mukofot miqdori soliqlar ushlab qolingunga qadar 4772,24 yevroni tashkil etadi. To‘lov ikki qismga bo‘linadi, birinchi qismi xodimlarga avgust oyi maoshi bilan birga beriladi.

Klub rahbariyati shu orqali «PSJ»ning o‘tgan mavsumdagi muvaffaqiyatlarini, jumladan, Chempionlar ligasidagi navbatdagi g‘alabasini nishonlashga qaror qildi. Bir yil avval ham parijliklar musobaqada klub tarixidagi ilk g‘alabadan so‘ng xodimlariga mukofot puli to‘lagan edi.

Mukofotni futbol va gandbol bo‘linmalari, «Park de Prens» stadionini boshqaruvchi kompaniya, shuningdek, «PSJ» fondi va xayriya tuzilmalari xodimlari oladi. To‘lov doimiy va muddatli shartnoma asosida ishlovchi xodimlar hamda stajyorlarga beriladi. Sport natijalari uchun allaqachon mukofot oladigan xodimlar esa bundan mustasno.

Mukofotni olish uchun o‘tgan mavsum davomida klubda amalda kamida sakkiz oy ishlagan bo‘lish talab etilgan.

«Barcha bo‘linmalardagi sportdagi muvaffaqiyatlarimiz, shuningdek, kompaniya va brend sifatidagi o‘sishimiz, innovasiya va ijodkorlik qobiliyatimiz ulkan jamoaviy mehnat natijasidir. Bu sizlarning yutuqlaringiz va muvaffaqiyatlaringiz», — deb yozdi «PSJ» prezidenti Nasser Al-Xelayfiy klub xodimlariga yo‘llagan maktubida.