«Atletik» futbolchilari klub rahbariyati bilan uy uchrashuvlariga bepul chiptalar ajratilishi bekor qilingani sababli ziddiyatga bordi.

As xabar berishicha, avval asosiy jamoaning har bir futbolchisi «San-Mames»dagi uy uchrashuvlariga to‘rtta bepul chipta olish imkoniyatiga ega edi. Biroq prezident Jon Uriarte boshchiligidagi klub rahbariyati ushbu imtiyozni to‘liq bekor qilishga qaror qildi.

Bu qaror klub xodimlari, sobiq futbolchilar, rahbarlar va avvalgi prezidentlarga ham taalluqli bo‘ldi.

Shu hafta «Atletik» futbolchilari klub bosh direktori bilan uchrashuv o‘tkazdi, ammo tomonlar kelishuvga erisha olmadi. Futbolchilar norozilik belgisi sifatida ommaviy axborot vositalariga intervyu bermaslikka qaror qildi.

«Barselona»dan 0:2 hisobida mag‘lub bo‘lganidan so‘ng, «Atletik»ning biror futbolchisi na rasmiy translyatorga, na mikst-zonadagi jurnalistlarga intervyu berdi. Hatto uchrashuvda jamoaning eng yaxshi futbolchisi deb topilgan Unay Simon ham kameralar qarshisida ko‘rinish bermadi.

«Atletik» matbuot xizmati vakili jurnalistlarga futbolchilarning bu qarorni klubdagi «ichki muammo» sababli o‘zlari qabul qilganini ma’lum qildi.

EITB va As ma’lumotlariga ko‘ra, endi «Atletik» La Liga tomonidan jarimaga tortilishi mumkin. Chunki futbolchilar uchrashuvlardan so‘ng teletranslyasiya huquqiga ega bo‘lgan kompaniyalar vakili bilan muloqot qilishi shart. Media majburiyatlarini bajarishdan bosh tortish klubning teletranslyasiya huquqlaridan oladigan daromadlariga ham ta’sir qilishi mumkin.