«Milan» yarim himoyachisi Aleksis Salemakers yangi mavsumni muvaffaqiyatli boshladi. Belgiyalik futbolchi «Venesiya»ga qarshi uchrashuvda ikkita golli uzatmani amalga oshirdi.

Uning yaxshi o‘yini Italiya A Seriyasining boshqa klublari e’tiborini ham tortmoqda. Pianetamilan.it nashri ma’lumotiga ko‘ra, «Atalanta» Salemakers transferi bo‘yicha «Milan»ga murojaat qilgan.

Biroq «rossoneri» futbolchi sotilmasligini ma’lum qilib, bergamoliklarning taklifini rad etgan.

Eslatib o‘tamiz, Salemakers o‘tgan yilning dekabr oyida «Milan» bilan shartnomasini rasman 2031 yilga qadar uzaytirgan edi.

Italiya chempionatining keyingi turida «Milan» 6 sentyabr kuni «Yuventus»ga qarshi maydonga tushadi.