Braziliya chempionatining navbatdagi turida «Santos» safarda «Korintians»ni minimal hisobda mag‘lub etdi.

Uchrashuv vaqtida teletranslyasiya kamerasi oilasi bilan stadionga kelgan yosh muxlisni ko‘rsatdi. Bolaning qo‘lida Neymarga atalgan plakat bor edi.

Unda: «Men «Korintians»ning ashaddiy muxlisiman, ammo sizning yanada katta muxlisingizman», — deb yozilgandi.

Uchrashuvdan so‘ng bu holatdan ta’sirlangan Neymar tribunaga yaqinlashib, bolaga o‘z futbolkasini sovg‘a qildi.

Biroq derbyderbyderby.it xabariga ko‘ra, «Korintians»ning ayrim radikal muxlislari klub mag‘lubiyati fonida bu holatni «xiyonat» sifatida qabul qilgan. Ular bolaning oilasiga bosim o‘tkazib, stadiondan chiqishiga to‘sqinlik qilishgan.

Vaziyatga polisiya xodimlari aralashib, oilaning stadionni xavfsiz tark etishini ta’minlagan.