Argentina terma jamoasi yarim himoyachisi Enso Fernandes Lionel Messining milliy jamoadan ketishi munosabati bilan ijtimoiy tarmoqda post qoldirdi.
39 yoshli futbolchi o‘zining Instagram sahifasida terma jamoadagi faoliyatini yakunlashini rasman ma’lum qilgandi.
«Leo, milliy terma jamoadan ketayotganingni aytganingda, juda xafa bo‘ldim.
Men hali juda yosh bola edim. Yoshingni o‘zimning yoshim bilan solishtirib, sen bilan qachondir birga o‘ynay olamanmi, deb doim hisob-kitob qilardim. Bu biroz kulgili tuyulishi mumkin, ammo men haqiqatan ham shunday o‘ylardim: senga yana qancha yil qolgan, mening professional futbolga kirishimga qancha vaqt bor? Hech bo‘lmaganda bir marta Argentina safida sen bilan birga o‘ynashni orzu qilardim.
Yaxshiyamki, sen qaytding. Voqelik esa o‘sha bolaning tasavvur qilganidan ham ajoyib bo‘lib chiqdi. Biz shunchaki birga o‘ynamadik. Birga yig‘inlarga bordik, bir xonada kiyim almashtirdik, suhbatlashdik, quchoqlashdik, qiyin damlarni ham, aql bovar qilmas lahzalarni ham birga boshdan kechirdik va oxir-oqibat birga jahon chempioni bo‘ldik.
Ammo eng muhimi, men terma jamoaga kelganimdan boshlab menga qanday munosabatda bo‘lganing uchun doimo minnatdor bo‘laman. Men o‘z kumirim bilan maydonga tushish umidida kelgandim, ammo ilk daqiqadanoq meni jamoaning bir qismidek his qildirgan insonni topdim. Sen doim kerakli paytda yaxshi so‘z, maslahat, quchoq yoki shunchaki meni tinchlantirishning biror yo‘lini toparding. Men buni hech qachon unutmayman», — deb yozdi 25 yoshli Enso ijtimoiy tarmoqdagi sahifasida.
