«Monako» hujumchisi Folarin Balogun «Everton»ga o‘tishga yaqin turibdi.

Insayder Fabrisio Romanoning xabar berishicha, Angliya Premyer-ligasi klubi va «Monako» 25 yoshli AQSH terma jamoasi hujumchisining transferi bo‘yicha kelishuvga erishgan.

Transfer summasi 45 million yevroni tashkil etadi. Bundan tashqari, yana 5 million yevro bonuslar ko‘rinishida to‘lanishi mumkin. Shuningdek, «Monako» futbolchining keyingi transferidan ma’lum foiz oladi.

Endi «Everton» Balogun bilan shaxsiy shartnoma borasida kelishib olishi kerak.

«Arsenal» tarbiyalanuvchisi o‘tgan mavsum Fransiya Liga 1 musobaqasida 30 ta o‘yinda 13 ta gol urdi va «Monako»ning eng yaxshi to‘purari bo‘ldi.

AQSHda o‘tkazilgan 2026 yilgi jahon chempionatida Balogun 4 ta uchrashuvda 3 ta gol urdi.

U musobaqa davomida qizil kartochkaning bekor qilinishi bilan bog‘liq mojaroning ham markazida qolgan edi. Balogun 1/16 finalda Bosniya va Gersegovinaga qarshi o‘yinda, AQSH 2:0 hisobida g‘alaba qozongan bahsda Tarik Muharemovichning to‘pig‘ini bosib ketgani uchun maydondan chetlatilgan.

Keyinchalik uning bir o‘yinlik diskvalifikasiyasi bir yillik sinov muddati bilan vaqtincha to‘xtatildi. Shu tariqa, AQSH hujumchisi 1/8 finalda Belgiyaga qarshi o‘yinda ishtirok eta oldi. Ushbu bahsda amerikaliklar 1:4 hisobida mag‘lub bo‘lgan.

AQSH prezidenti Donald Tramp mazkur vaziyatni FIFA prezidenti Janni Infantino bilan muhokama qilganini ham ma’lum qilgan.