«Монако» ҳужумчиси Фоларин Балогун «Эвертон»га ўтишга яқин турибди.

Инсайдер Фабрицио Романонинг хабар беришича, Англия Премьер-лигаси клуби ва «Монако» 25 ёшли АҚШ терма жамоаси ҳужумчисининг трансфери бўйича келишувга эришган.

Трансфер суммаси 45 миллион еврони ташкил этади. Бундан ташқари, яна 5 миллион евро бонуслар кўринишида тўланиши мумкин. Шунингдек, «Монако» футболчининг кейинги трансферидан маълум фоиз олади.

Энди «Эвертон» Балогун билан шахсий шартнома борасида келишиб олиши керак.

«Арсенал» тарбияланувчиси ўтган мавсум Франция Лига 1 мусобақасида 30 та ўйинда 13 та гол урди ва «Монако»нинг энг яхши тўпурари бўлди.

АҚШда ўтказилган 2026 йилги жаҳон чемпионатида Балогун 4 та учрашувда 3 та гол урди.

У мусобақа давомида қизил карточканинг бекор қилиниши билан боғлиқ можаронинг ҳам марказида қолган эди. Балогун 1/16 финалда Босния ва Герцеговинага қарши ўйинда, АҚШ 2:0 ҳисобида ғалаба қозонган баҳсда Тарик Муҳаремовичнинг тўпиғини босиб кетгани учун майдондан четлатилган.

Кейинчалик унинг бир ўйинлик дисквалификацияси бир йиллик синов муддати билан вақтинча тўхтатилди. Шу тариқа, АҚШ ҳужумчиси 1/8 финалда Бельгияга қарши ўйинда иштирок эта олди. Ушбу баҳсда америкаликлар 1:4 ҳисобида мағлуб бўлган.

АҚШ президенти Дональд Трамп мазкур вазиятни ФИФА президенти Жанни Инфантино билан муҳокама қилганини ҳам маълум қилган.