Madridning «Atletiko» klubi «Yuventus» hujumchisi Jonatan Devidni ijaraga olganini rasman e’lon qildi.

Ispaniya klubi rasmiy sayti ma’lumotiga ko‘ra, kanadalik futbolchi joriy mavsum oxiriga qadar «matraschilar» safida to‘p suradi. Shuningdek, kelishuvga futbolchini keyinchalik sotib olish huquqi ham kiritilgan.

Jonatan Devid o‘tgan yil yozidan buyon «Yuventus» sharafini himoya qilib kelayotgan edi. Hujumchi Turin klubi safida barcha musobaqalar doirasida 47 ta o‘yin o‘tkazib, 8 ta gol urdi va 5 ta golli uzatmani amalga oshirdi.

26 yoshli futbolchining «Yuventus» bilan amaldagi shartnomasi 2030 yilning o‘rtalariga qadar mo‘ljallangan.

Avvalroq «Atletiko» Jonatan Devidni taxminan 25 million yevroga sotib olish huquqiga ega bo‘lishi haqida xabarlar tarqalgan edi.