«Real» bosh murabbiyi Joze Mourinyo Raul Asensioning maydondan tashqaridagi xatti-harakatlari klub obro‘siga zarar yetkazayotganini aytdi.

Avgust oyida 23 yoshli himoyachi mast holda avtomobil boshqargani uchun 8 oyga haydovchilik huquqidan mahrum qilingan va 14 400 yevro jarimaga tortilgan edi. «Real» klub imijiga yetkazilgan zarar sababli futbolchiga nisbatan intizomiy ish qo‘zg‘atgan.

— Men jamoaga kelganimda u bilan o‘tmishi haqida gaplashdim. Shundan beri maydondan tashqaridagi xulq-atvori masalasini boshqa muhokama qilmayapman. «Valdebebas»da u namunaviy professional. Sog‘lom bo‘lgan paytda undan ko‘ra ko‘proq mehnat qilgan futbolchi yo‘q edi. Hozir ham u mashg‘ulotga birinchi bo‘lib keladi va oxirgi bo‘lib ketadi.

Ammo «Real» futbolchisi 24 soat, haftaning 7 kuni va yilning 12 oyi davomida «Real» futbolchisi bo‘lib qoladi. Futboldan tashqarida nima ish qilmang, baribir «Real» klubi nomidan ish ko‘rayotgan bo‘lasiz. Bunday holatlar klub obro‘siga zarar yetkazadi, klubning obro‘si esa daxlsizdir. Men undan noroziman. Hamma xato qiladi, ammo xatolarning turi har xil bo‘ladi.

— Asensio o‘ynay oladimi?

— Klub tergovni boshladi. Tekshiruv davom etayotgan bir paytda men uni «Real» futbolchisi deb hisoblayman. U jarohat olgan va yana bir necha hafta maydonga tusha olmaydi. Bu menga muammolardan biroz chetlashish imkonini beradi, — dedi Mourinyu «Betis»ga qarshi o‘yin oldidan o‘tkazilgan matbuot anjumanida.