O‘zbekiston Superligasining 20-turida "Nasaf" o‘z maydonida "Neftchi"ni 6:2 hisobida mag‘lub etdi. Uchrashuvdan keyingi statistik ko‘rsatkichlar Qarshidagi bahs qanchalik g‘ayrioddiy kechganini ko‘rsatadi.
E’tiborlisi, xG ko‘rsatkichi bo‘yicha "Neftchi" ustunlik qilgan — 2,53 ga 2,23. To‘p nazoratida ham farg‘onaliklar katta ustunlikka ega bo‘ldi: 63 foizga 37 foiz.
Ikki jamoa ham raqib darvozasi tomon 15 tadan zarba yo‘lladi. Biroq aniq zarbalar bo‘yicha "Nasaf"ning ustunligi katta bo‘ldi — 11:6. Mezbonlar shu imkoniyatlardan maksimal darajada foydalanib, 6 ta gol urishga muvaffaq bo‘ldi.
Paslar aniqligida "Neftchi" 82 foiz, "Nasaf" esa 72 foizlik natija qayd etdi. Burchak zarbalari mezbonlar foydasiga 7:5, kalit paslar bo‘yicha esa 9:8 ko‘rinishida bo‘ldi.
Shu tariqa, "Neftchi" to‘p nazorati va xG bo‘yicha raqibidan yaxshiroq ko‘rsatkich qayd etganiga qaramay, "Nasaf" hujumdagi yuqori samaradorlik evaziga 6:2 hisobida yirik g‘alabani qo‘lga kiritdi.
