Ўзбекистон Суперлигасининг 20-турида "Насаф" ўз майдонида "Нефтчи"ни 6:2 ҳисобида мағлуб этди. Учрашувдан кейинги статистик кўрсаткичлар Қаршидаги баҳс қанчалик ғайриоддий кечганини кўрсатади.
Эътиборлиси, xG кўрсаткичи бўйича "Нефтчи" устунлик қилган — 2,53 га 2,23. Тўп назоратида ҳам фарғоналиклар катта устунликка эга бўлди: 63 фоизга 37 фоиз.
Икки жамоа ҳам рақиб дарвозаси томон 15 тадан зарба йўллади. Бироқ аниқ зарбалар бўйича "Насаф"нинг устунлиги катта бўлди — 11:6. Мезбонлар шу имкониятлардан максимал даражада фойдаланиб, 6 та гол уришга муваффақ бўлди.
Паслар аниқлигида "Нефтчи" 82 фоиз, "Насаф" эса 72 фоизлик натижа қайд этди. Бурчак зарбалари мезбонлар фойдасига 7:5, калит паслар бўйича эса 9:8 кўринишида бўлди.
Шу тариқа, "Нефтчи" тўп назорати ва xG бўйича рақибидан яхшироқ кўрсаткич қайд этганига қарамай, "Насаф" ҳужумдаги юқори самарадорлик эвазига 6:2 ҳисобида йирик ғалабани қўлга киритди.
