«Yuventus»ning sobiq bosh direktori Luchano Modji jamoa yana dunyoning eng kuchli klublari qatoriga qaytishi uchun hali bir necha yil kerakligini aytdi.
Modjining fikricha, turinliklar yozgi transferlar davrida tarkibni kuchaytirish borasida yaxshi ishladi, ammo klub hali avvalgi darajasiga to‘liq qaytgani yo‘q.
U «Yuventus»da futbol qarorlarini qabul qilishda algoritmlardan ko‘ra futbol bo‘yicha bilim va mutaxassislar tajribasiga ko‘proq e’tibor qaratilayotganini ijobiy baholadi.
«Massara, Ottolini va Karnevali o‘z ishini yaxshi biladi», — dedi Modji Tuttomercatoweb nashriga.
Biroq uning ta’kidlashicha, jamoani yana yuqori darajaga olib chiqish jarayoni birdaniga amalga oshmaydi. «Barchasini iziga qaytarish uchun bir-ikki yil kerak bo‘ladi», — dedi «Yuventus»ning sobiq rahbari.
