«Shalke-04» kuzatuv kengashi raisi Aleks Xefer «Bavariya» darvozaboni Manuel Noyer futbolchilik faoliyatini yakunlaganidan so‘ng klubga qaytishi mumkinligini istisno qilmadi.

40 yoshli Noyer joriy mavsum yakunida faoliyatini tugatishi mumkin. «Shalke»ning «Bavariya»ga qarshi shanba kunigi o‘yini oldidan Xefer darvozabon avvalo futboldan keyingi bo‘sh vaqtini mazmunli o‘tkazishi, shundan so‘ng kelajakda nima bilan shug‘ullanishini hal qilishi kerakligini aytdi.

«Shundan keyin u o‘zining eski uyidami yoki yangi uyidami ishlaydi — buni Noyerning o‘zi hal qilishi kerak», — dedi Xefer Bild nashriga bergan intervyusida.

Noyer Gelzenkirxenda tug‘ilgan va «Shalke» futbol akademiyasi tarbiyalanuvchisi hisoblanadi. Uning 2011 yilda «Bavariya»ga o‘tishi klubning ko‘plab muxlislarida norozilik uyg‘otgan edi. Biroq Xefer bu kelishmovchiliklar allaqachon o‘tmishda qolgan, deb hisoblaydi.

«Klub sifatida biz uning faoliyati bilan faxrlanishimiz mumkin. Uning ketishi biroz bahsli kechgan edi, ammo shaxsan men har kim xato qilishi mumkin, ayniqsa yoshlikda, deb hisoblayman», — dedi Xefer.

Avvalroq «Bavariya» prezidenti Gerbert Xayner ham klub sobiq futbolchilarini faoliyati yakunlanganidan keyin ishga jalb qilishni istashini aytgan edi. Uning fikricha, bunday mutaxassislar katta tajribaga va klub hamda professional futbolni chuqur tushunish qobiliyatiga ega.