O‘zbekiston Superligasida 20-tur uchrashuvlari yakunlanganidan so‘ng to‘purarlar poygasidagi holat ham yangilandi.

"So‘g‘diyona" legioneri Lyupcho Doriyev 14 ta gol bilan ro‘yxatni boshqarib turibdi. U 20-turda "Mash’al"ga qarshi 5:2 hisobida yakunlangan uchrashuvda ham raqib darvozasini ishg‘ol qilib, peshqadamlikdagi ustunligini oshirdi.

Ikkinchi o‘rinda "Neftchi" hujumchisi Stipe Perisa bormoqda. Xorvatiyalik futbolchi hisobida 11 ta gol mavjud. Shu tariqa, Doriyev va uning eng yaqin ta’qibchisi o‘rtasidagi farq 3 ta golni tashkil etmoqda.

Anvarjon Hojimirzayev ("Dinamo"), Temurxo‘ja Abduxoliqov ("Lokomotiv"), Bobur Abduxoliqov ("Nasaf") va Sherzod Esanov ("Buxoro") 9 tadan gol bilan keyingi o‘rinlarni egallab turishibdi. Husayn Norchayev ("Navbahor") va Stefen Chinedu ("Paxtakor") hisobida esa 8 tadan gol bor.