Xalqaro futbol federasiyasi — FIFAning Etika qo‘mitasi Norvegiya futbol assosiasiyasining FIFA prezidenti Janni Infantino ustidan berilgan shikoyat qanday ko‘rib chiqilayotgani haqida ma’lumot taqdim etish so‘rovini rad etdi. Bu haqda The Times xabar bermoqda.
Shikoyat AQSH prezidenti Donald Trampga "FIFA Tinchlik mukofoti" topshirilgani bilan bog‘liq.
Manba ma’lumotiga ko‘ra, FIFA Etika qo‘mitasi tergov palatasi raisi, Ruanda vakili Martin Ngoga Norvegiya federasiyasining ish bo‘yicha yangilangan ma’lumotlarni olish iltimosini rad etgan.
"Faqat bevosita ish yurituvi ob’ekti bo‘lgan shaxslar ushbu jarayonning tomoni hisoblanadi. Etika masalalari bo‘yicha ishlar maxfiy xususiyatga ega bo‘lgani sababli, biz umuman qandaydir ish yurituvi bor-yo‘qligi yoki ehtimoliy ishlar qaysi bosqichda ekani haqida ma’lumot bera olmaymiz", — deyiladi Ngoganing javobida.
Norvegiya futbol assosiasiyasi 2026 yil may oyi oxiri — iyun boshida Etika qo‘mitasiga xat yo‘llab, ish ochiq va shaffof tarzda ko‘rib chiqilishini talab qilgan.
Tashkilot prezidenti Lize Klaveness o‘shanda bu talab "qonun ustuvorligi kafolatlari" bilan bog‘liq ekanini aytgan. Uning ta’kidlashicha, qo‘mita shikoyatni ko‘rib chiqmaslikka qaror qilgan taqdirda ham shaffoflikni ta’minlashi kerak.
Shikoyat 2025 yil 8 dekabrda Britaniyaning FairSquare huquqni himoya qilish tashkiloti tomonidan FIFA Etika qo‘mitasining tergov palatasiga taqdim etilgan.
Bu Infantino Vashingtonda bo‘lib o‘tgan 2026 yilgi jahon chempionati qur’asini tashlash marosimida Trampga mukofotni topshirganidan uch kun o‘tib sodir bo‘lgan.
FairSquare Infantinoni FIFA ustavi va Etika kodeksida belgilangan siyosiy betaraflik majburiyatini, xususan, 15-moddani buzganlikda ayblagan.
Shikoyatda, shuningdek, mukofotni ta’sis etish va uni FIFA kengashiga aniq tarzda taqdim etmasdan topshirish bilan bog‘liq prosessual qoidabuzarliklar bo‘lgani ham da’vo qilingan.
FIFA 12 dekabr kuni shikoyatni olganini tasdiqlagan, ammo tergov boshlangan-boshlanmagani yoki u qaysi bosqichda ekanini ochiqlamagan.
