Халқаро футбол федерацияси — ФИФАнинг Этика қўмитаси Норвегия футбол ассоциациясининг ФИФА президенти Жанни Инфантино устидан берилган шикоят қандай кўриб чиқилаётгани ҳақида маълумот тақдим этиш сўровини рад этди. Бу ҳақда The Times хабар бермоқда.
Шикоят АҚШ президенти Дональд Трампга "ФИФА Тинчлик мукофоти" топширилгани билан боғлиқ.
Манба маълумотига кўра, ФИФА Этика қўмитаси тергов палатаси раиси, Руанда вакили Мартин Нгога Норвегия федерациясининг иш бўйича янгиланган маълумотларни олиш илтимосини рад этган.
"Фақат бевосита иш юритуви объекти бўлган шахслар ушбу жараённинг томони ҳисобланади. Этика масалалари бўйича ишлар махфий хусусиятга эга бўлгани сабабли, биз умуман қандайдир иш юритуви бор-йўқлиги ёки эҳтимолий ишлар қайси босқичда экани ҳақида маълумот бера олмаймиз", — дейилади Нгоганинг жавобида.
Норвегия футбол ассоциацияси 2026 йил май ойи охири — июнь бошида Этика қўмитасига хат йўллаб, иш очиқ ва шаффоф тарзда кўриб чиқилишини талаб қилган.
Ташкилот президенти Лизе Клавенесс ўшанда бу талаб "қонун устуворлиги кафолатлари" билан боғлиқ эканини айтган. Унинг таъкидлашича, қўмита шикоятни кўриб чиқмасликка қарор қилган тақдирда ҳам шаффофликни таъминлаши керак.
Шикоят 2025 йил 8 декабрда Британиянинг FairSquare ҳуқуқни ҳимоя қилиш ташкилоти томонидан ФИФА Этика қўмитасининг тергов палатасига тақдим этилган.
Бу Инфантино Вашингтонда бўлиб ўтган 2026 йилги жаҳон чемпионати қуръасини ташлаш маросимида Трампга мукофотни топширганидан уч кун ўтиб содир бўлган.
FairSquare Инфантинони ФИФА устави ва Этика кодексида белгиланган сиёсий бетарафлик мажбуриятини, хусусан, 15-моддани бузганликда айблаган.
Шикоятда, шунингдек, мукофотни таъсис этиш ва уни ФИФА кенгашига аниқ тарзда тақдим этмасдан топшириш билан боғлиқ процессуал қоидабузарликлар бўлгани ҳам даъво қилинган.
ФИФА 12 декабрь куни шикоятни олганини тасдиқлаган, аммо тергов бошланган-бошланмагани ёки у қайси босқичда эканини очиқламаган.
