Luka Modrich bu yilgi "Oltin to‘p" uchun o‘z favoritini aytishdan bosh tortdi.

"Milan" yarim himoyachisi klubning Milanellodagi mashg‘ulot bazasida AS nashriga intervyu berdi. Undan mukofot uchun asosiy da’vogarlar haqida so‘raldi.

Kilian Mbappe, Rodri va Jud Bellingem "Oltin to‘p" uchun kurashda asosiy nomzodlar qatorida tilga olinmoqda, ammo xorvatiyalik futbolchi ulardan birortasini alohida ajratib ko‘rsatishni istamadi.

"Rostini aytsam, bilmayman. Hech kimning nomini aytgim yoki kim bu mukofotga ko‘proq loyiq ekanini ta’kidlagim kelmaydi. Ovoz berishadi va g‘olibni aniqlashadi. "Real" va boshqa jamoalardan ko‘plab nomzodlar bor. Kim g‘alaba qozonishini ko‘ramiz. Men nomlarni tilga olmaslikni afzal ko‘raman", — dedi Modrich.

Modrichning o‘zi ham ushbu sovrinni qo‘lga kiritgan. U 2018 yilda "Oltin to‘p"ni yutib, 2007 yildan keyin Lionel Messi va Krishtianu Ronaldudan tashqari bu mukofotga sazovor bo‘lgan birinchi futbolchiga aylangan edi.

Xorvatiyalik futbolchi bu yutug‘i bilan hamon faxrlanishini ta’kidlab, "Oltin to‘p"ni "futboldagi eng katta individual mukofot" deb atadi.

Modrich "Real"da birga to‘p tepgan Jud Bellingem haqida ham iliq fikr bildirdi.

"Birinchi kundanoq unda boshqacha nimadir borligini ko‘rdim", — dedi Modrich Angliya terma jamoasi futbolchisi haqida.

Xorvatiyalik yarim himoyachi Bellingemda yetakchiga aylanish uchun barcha sifatlar bor deb hisoblaydi. Modrichga ayniqsa uning jahon chempionatidagi o‘yini va keyingi rivojlanishi katta taassurot qoldirgan.