Лука Модрич бу йилги "Олтин тўп" учун ўз фаворитини айтишдан бош тортди.
"Милан" ярим ҳимоячиси клубнинг Миланеллодаги машғулот базасида AS нашрига интервью берди. Ундан мукофот учун асосий даъвогарлар ҳақида сўралди.
Килиан Мбаппе, Родри ва Жуд Беллингем "Олтин тўп" учун курашда асосий номзодлар қаторида тилга олинмоқда, аммо хорватиялик футболчи улардан бирортасини алоҳида ажратиб кўрсатишни истамади.
"Ростини айтсам, билмайман. Ҳеч кимнинг номини айтгим ёки ким бу мукофотга кўпроқ лойиқ эканини таъкидлагим келмайди. Овоз беришади ва ғолибни аниқлашади. "Реал" ва бошқа жамоалардан кўплаб номзодлар бор. Ким ғалаба қозонишини кўрамиз. Мен номларни тилга олмасликни афзал кўраман", — деди Модрич.
Модричнинг ўзи ҳам ушбу совринни қўлга киритган. У 2018 йилда "Олтин тўп"ни ютиб, 2007 йилдан кейин Лионель Месси ва Криштиану Роналдудан ташқари бу мукофотга сазовор бўлган биринчи футболчига айланган эди.
Хорватиялик футболчи бу ютуғи билан ҳамон фахрланишини таъкидлаб, "Олтин тўп"ни "футболдаги энг катта индивидуал мукофот" деб атади.
Модрич "Реал"да бирга тўп тепган Жуд Беллингем ҳақида ҳам илиқ фикр билдирди.
"Биринчи кунданоқ унда бошқача нимадир борлигини кўрдим", — деди Модрич Англия терма жамоаси футболчиси ҳақида.
Хорватиялик ярим ҳимоячи Беллингемда етакчига айланиш учун барча сифатлар бор деб ҳисоблайди. Модричга айниқса унинг жаҳон чемпионатидаги ўйини ва кейинги ривожланиши катта таассурот қолдирган.
