«Barselona» yarim himoyachisi Fermin Lopes yoshligidagi qiyin davrda Lionel Messi va Andres Inyesta unga jismoniy imkoniyatlariga boshqacha qarashga yordam berganini aytdi.

Ferminning ta’kidlashicha, har ikki futbolchi u uchun nafaqat erishgan yutuqlari, balki jismoniy jihatdan o‘ziga o‘xshash bo‘lgani uchun ham muhim namuna hisoblangan.

«Ular menga bo‘yi past bo‘lish insonni o‘zini boshqalardan past his qilishga majbur etmasligini ko‘rsatdi», — dedi Ispaniya terma jamoasi a’zosi.

Ferminning so‘zlariga ko‘ra, nisbatan past bo‘yli ikki futbolchining dunyodagi eng yaxshilar qatoriga kirganini ko‘rish unga o‘z shubhalarini yengish va katta maqsadlarga intilish uchun ishonch bergan.

U shuningdek, past bo‘yli futbolchilarga xos ayrim ustun jihatlarni, xususan, tez fikrlash va qaror qabul qilish qobiliyatini ham alohida qayd etdi.

«Ular menga hech qachon o‘zimdan shubhalanmaslik va orzularimga erisha olishimga ishonishga yordam berdi», — dedi Fermin.

Yarim himoyachi keyinchalik «Barselona» asosiy tarkibida o‘z o‘rnini topdi va qiyin o‘tgan yozdan so‘ng yaqinda yana maydonga qaytdi.