«Bavariya» hujumchisi Xarri Keyn Chempionlar ligasidagi gollari sonini 55 taga yetkazdi. U umumiy bosqich birinchi turida Norvegiyaning «Budyo-Glimt» jamoasiga qarshi uchrashuvning 61-daqiqasida hisobni 2:0 ko‘rinishiga keltirdi. Myunxenliklar qolgan vaqtda yana uch marta raqib darvozasini ishg‘ol etib, 5:0 hisobida g‘alaba qozondi.
Squawka ma’lumotiga ko‘ra, Keyn Chempionlar ligasida 55 ta gol urish uchun 71 ta uchrashuv o‘tkazgan. Bu musobaqa tarixidagi uchinchi eng yaxshi natija hisoblanadi. Undan oldin mazkur marraga Erling Xoland 49 ta, Rud van Nistelroy esa 70 ta o‘yinda erishgan.
Keyn 2023 yildan buyon «Bavariya» sharafini himoya qilmoqda. Unga qadar angliyalik hujumchi «Tottenxem» safida to‘p tepgan.
