La Liga klublarni moliyaviy barqarorlikni saqlashga majbur qilish maqsadida maoshlar limitini belgilaydi. Har bir klub uchun ushbu ko‘rsatkich uning moliyaviy holatidan kelib chiqib muntazam ravishda qayta ko‘rib chiqiladi.

Maosh limiti — klub bir mavsum davomida futbolchilar va xodimlarga to‘lashi mumkin bo‘lgan eng yuqori umumiy summa. Ushbu cheklovdan oshib ketish yangi futbolchilarni ro‘yxatdan o‘tkazish imkoniyatiga ta’sir qiladi.

«Real» La Liga klublari orasida eng yuqori maosh limitiga ega. Madridliklar joriy mavsumda ish haqi uchun 832,79 million yevrogacha sarflashi mumkin. O‘tgan yili bu ko‘rsatkich 761,23 million yevro edi.

«Barselona» uchun belgilangan maosh limiti esa 582,77 million yevroni tashkil qildi. Kataloniya klubining moliyaviy imkoniyatlari ham sezilarli yaxshilangan: o‘tgan yili mart oyida limit 351,28 million yevro, sentyabrda esa 432,8 million yevro edi.

Ayni paytda eng past maosh limiti «Sevilya»ga tegishli — klub uchun belgilangan cheklov 20,16 million yevroni tashkil qiladi.