Ла Лига клубларни молиявий барқарорликни сақлашга мажбур қилиш мақсадида маошлар лимитини белгилайди. Ҳар бир клуб учун ушбу кўрсаткич унинг молиявий ҳолатидан келиб чиқиб мунтазам равишда қайта кўриб чиқилади.

Маош лимити — клуб бир мавсум давомида футболчилар ва ходимларга тўлаши мумкин бўлган энг юқори умумий сумма. Ушбу чекловдан ошиб кетиш янги футболчиларни рўйхатдан ўтказиш имкониятига таъсир қилади.

«Реал» Ла Лига клублари орасида энг юқори маош лимитига эга. Мадридликлар жорий мавсумда иш ҳақи учун 832,79 миллион еврогача сарфлаши мумкин. Ўтган йили бу кўрсаткич 761,23 миллион евро эди.

«Барселона» учун белгиланган маош лимити эса 582,77 миллион еврони ташкил қилди. Каталония клубининг молиявий имкониятлари ҳам сезиларли яхшиланган: ўтган йили март ойида лимит 351,28 миллион евро, сентябрда эса 432,8 миллион евро эди.

Айни пайтда энг паст маош лимити «Севилья»га тегишли — клуб учун белгиланган чеклов 20,16 миллион еврони ташкил қилади.