Fransiya terma jamoasining yangi bosh murabbiyi Zinedin Zidan Italiya A Seriyasi futbolchilarini diqqat bilan kuzatmoqda.

Fransiya OAV ma’lumotlariga ko‘ra, mutaxassis "Komo" sardori Lukas Da Kunya va "Inter" vingeri Andi Diufni terma jamoaga nomzod sifatida ko‘rib chiqmoqda.

Zidan AQSH, Kanada va Meksikada o‘tkazilgan JCH-2026da Fransiya terma jamoasi 4-o‘rinni egallaganidan keyin Didye Desham o‘rnini egalladi.

Uning Fransiya terma jamoasidagi debyuti 25 sentyabr kuni Millatlar ligasida Turkiyaga qarshi uchrashuvda bo‘ladi. 28 sentyabr kuni esa fransuzlar Belgiya bilan bahs olib boradi.

25 yoshli Da Kunya dastlabki kengaytirilgan ro‘yxatga kiritilgan. U avval Fransiya U-19 terma jamoasida o‘ynagan, shuningdek, Fransiya va Portugaliya fuqaroligiga ega.

Futbolchi 2023 yil yanvaridan buyon "Komo" sharafini himoya qilib kelmoqda va klub bilan birga B Seriyadan Chempionlar ligasigacha bo‘lgan yo‘lni bosib o‘tdi.

Zidan kuzatayotgan yana bir futbolchi — 23 yoshli Andi Diuf. U "Inter"dagi birinchi mavsumida qiyinchiliklarga duch kelgan bo‘lsa-da, joriy mavsumda o‘ng qanotda yaxshi o‘yin ko‘rsatmoqda.

Diuf 2024 yilgi Olimpiadada Fransiya terma jamoasi safida 2 ta o‘yin o‘tkazgan, shuningdek, mamlakatning bir nechta yoshlar terma jamoalarida ham to‘p surgan.

Fransiyaning dastlabki ro‘yxatida taxminan 50 nafar futbolchi bor. Shu bois Da Kunya va Diufning Millatlar ligasi o‘yinlariga yakuniy tarkibdan joy olishi hozircha kafolatlanmagan.