«Inter» yarim himoyachisi Haqon Chalxanoglu bilan shartnomani uzaytirishni rejalashtirmoqda, ammo tomonlar muzokaralarda shoshilmayapti.
Goal portali Tuttosport nashriga tayanib xabar berishicha, muzokaralar davomida Chalxanogluning tez-tez mushak jarohatlari olishi masalasi ham muhokama qilingan.
Navbatdagi muzokaralar chog‘ida «Inter» turkiyalik futbolchiga hozirgi maoshidan kamroq miqdorda yangi shartnoma taklif qilishi kutilmoqda. Ayni paytda Chalxanoglu soliqlardan tashqari yiliga 6,5 million yevro maosh oladi.
Milan klubi futbolchiga «1+1» formatida yoki to‘g‘ridan-to‘g‘ri ikki yillik shartnoma taklif qilishi mumkin.
Chalxanogluning «Inter» bilan amaldagi kelishuvi 2026/27 yilgi mavsum oxiriga qadar mo‘ljallangan.
Yarim himoyachi «Inter» safida jami 216 ta o‘yin o‘tkazib, 52 ta gol urgan va 39 ta golli uzatmani amalga oshirgan.
