«Интер» ярим ҳимоячиси Ҳақон Чалханоглу билан шартномани узайтиришни режалаштирмоқда, аммо томонлар музокараларда шошилмаяпти.

Goal портали Tuttosport нашрига таяниб хабар беришича, музокаралар давомида Чалханоглунинг тез-тез мушак жароҳатлари олиши масаласи ҳам муҳокама қилинган.

Навбатдаги музокаралар чоғида «Интер» туркиялик футболчига ҳозирги маошидан камроқ миқдорда янги шартнома таклиф қилиши кутилмоқда. Айни пайтда Чалханоглу солиқлардан ташқари йилига 6,5 миллион евро маош олади.

Милан клуби футболчига «1+1» форматида ёки тўғридан-тўғри икки йиллик шартнома таклиф қилиши мумкин.

Чалханоглунинг «Интер» билан амалдаги келишуви 2026/27 йилги мавсум охирига қадар мўлжалланган.

Ярим ҳимоячи «Интер» сафида жами 216 та ўйин ўтказиб, 52 та гол урган ва 39 та голли узатмани амалга оширган.