«Arsenal» vinger Noni Maduekeni yanvar oyida ijaraga berish variantini ko‘rib chiqishga tayyor. «Yuventus» esa futbolchining vaziyatini diqqat bilan kuzatib bormoqda.

23 yoshli angliyalik futbolchi Mikel Arteta jamoasidagi rotasiyada o‘z o‘rnini yo‘qotgan. U joriy mavsumdagi 6 ta o‘yindan 4 tasida maydonga tushib, jami taxminan 100 daqiqa harakat qildi.

London klubi futbolchining transfer qiymati pasayib ketishini istamaydi. Shu sabab «Arsenal» Maduekega yuqori saviyada, jumladan yevrokuboklarda ham muntazam o‘yin amaliyoti kafolatlaydigan klubga uni ijaraga berishga tayyor.

Maduekening «Arsenal» bilan amaldagi shartnomasi 2030 yil iyun oyiga qadar mo‘ljallangan.

«Yuventus» futbolchini ijaraga olishga nafaqat taktik, balki moliyaviy sabablarga ko‘ra ham qiziqmoqda. Turin klubi katta transferlarni amalga oshirish uchun avval futbolchilar sotishi kerak bo‘lishi mumkin.

Shuningdek, «Atletiko» ham Madueke ijarasiga qiziqish bildirmoqda. Ayniqsa, «Arsenal» kelishuvga futbolchini bozor qiymatidan pastroq summaga sotib olish huquqini kiritishga rozi bo‘lsa, madridliklarning qiziqishi yanada kuchayishi mumkin.