«Atletiko» yarim himoyachisi Koke La Liganing 8-turida «Osasuna» ustidan 4:0 hisobida qozonilgan g‘alabadan so‘ng fikr bildirdi.

Jamoa haqida:

«Safimizga yuqori saviyali futbolchilar keldi. Tarkibimiz juda kuchli. Jamoa ajoyib o‘yin o‘tkazdi va biz aynan shunga — yuqori raqobat va o‘sishga intilishimiz kerak.

Yaqinda 3:0 hisobida g‘alaba qozondik, bugun esa 4:0. Biz shu yo‘nalishda davom etishimiz kerak», — dedi Koke.

«Real»ga qarshi bo‘lajak uchrashuv haqida:

«Derbi har doim alohida ahamiyatga ega, ayniqsa, o‘z maydoningda o‘ynasang. Ular bizning shahardagi raqibimiz va biz ularni mag‘lub etishni istaymiz.

Biroq buning uchun hamma ishni juda yaxshi bajarishimiz kerak, chunki “Real” kuchli jamoa. G‘alaba qozonib, muxlislarimizni xursand qilishga umid qilamiz».

«Atletiko» safidagi 747 ta o‘yini haqida:

«Bu mehnat va ko‘p narsani to‘g‘ri qilganim natijasi. Demak, hali ancha vaqt o‘ynashim kerak. Oldinda yana ko‘plab uchrashuvlar bo‘lishiga umid qilaman.

Eng muhimi — menga qanday vazifa berilmasin, jamoaga foyda keltirish», — dedi Koke.

«Atletiko» ayni paytda 13 ochko bilan Ispaniya chempionati turnir jadvalida uchinchi o‘rinni egallab turibdi.