Londonning «Chelsi» klubi rahbariyatdagi o‘zgarishlar fonida rasmiy bayonot e’lon qildi. Bir kun avval amerikalik biznesmen Todd Bouli klub direktorlar kengashi raisi lavozimini tark etgan edi.

«Kechagi kun «Chelsi» tarixida muhim bosqich va yangi sahifaning boshlanishi bo‘ldi. Biz klubni tark etayotgan hamkorlarimizga minnatdorlik bildiramiz va ularning «Chelsi» rivojiga qo‘shgan hissasini yuksak qadrlaymiz.

Endi biz umumiy maqsad, aniq yo‘nalish va kelajakka ishonch bilan oldinga harakat qilamiz. Maqsadlarimiz ravshan: eng yuqori darajada raqobatlashish, yirik sovrinlarni qo‘lga kiritish va barqaror muvaffaqiyatga erishish.

«Chelsi» muxlislari — klubning yuragi. Ular 120 yildan ortiq vaqt davomida uning haqiqiy posbonlari bo‘lib kelmoqda. Klubga egalik qilish mas’uliyati bizda bo‘lsa-da, bu har doim sizning klubingiz bo‘lib qoladi. Biz sizlarni tinglashga va maydonda ham, uning tashqarisida ham faxrlanishingiz mumkin bo‘lgan «Chelsi»ni barpo etishga intilamiz.

Maydondagi muvaffaqiyat doimo asosiy ustuvor vazifamiz bo‘lib qoladi. Bu Premyer-liga va boshqa yirik musobaqalarda g‘oliblik uchun kurashishni, shuningdek, jamoaga muntazam sarmoya kirita olishimiz uchun klubning tijoriy salohiyatini mustahkamlashni anglatadi.

Shuningdek, «Chelsi»ning kelajakdagi infratuzilmasiga ham e’tibor qaratamiz. Oqilona sarmoya kiritib, kelgusi avlodlar uchun eng to‘g‘ri va uzoq muddatli yechimlarni izlaymiz.

Biz «Chelsi» nimalarga erisha olishi borasida katta ambisiyalarga egamiz. Shu bilan birga, bunday buyuk klubni boshqarish zimmamizga katta mas’uliyat yuklashini ham yaxshi anglaymiz.

«Chelsi»ning birgalikda oldinga harakat qilishi uchun ishlashda davom etamiz», — deyiladi klub egalari nomidan berilgan bayonotda.